• Ficobak eta AZTIk sustatzen dute Kongresua, eta aurten bere eremu geografikoa zabaldu du arku atlantikoko kostak barne harturik.
  • 45 adituk parte hartuko du Kongresuaren edizio honetan.
  • 150 biltzarkidek baieztatu du bertaratuko dela.
  • Iñigo Losada eta Robert Nicholls, gonbidatutako hizlarien artean.
  • Kongresuaren edukia enpresa erakusketari multzo batekin indartu da.

(Irunen, 2018ko martxoaren 1ean) Zergatik kezkatu behar gaitu tenperatura globala 2 gradu igotzeak, gure gorputzean ia-ia ezin badugu nabaritu diferentzia hori?

Halako berotze baten ondorioz, adibidez, ehunka kilometro mugiaraz daitezke itsasoko bizitzaren banaketa-eremuak poloetarako norabidean. Baina, beharbada, kezkagarriena da ziurgabetasuna ekarriko duela berekin, eta mugatzeko zaila izango dela, batetik, neurri batean ezezaguna delako zer zeregin bete dezakeen ozeanoak klimaren erregulazioan eta, bestetik, itsasoko ekosistemek erantzun ugariak eman ditzaketelako. Ziurgabetasun horren kausa ez dira datuen zehaztasun eza edo sistemen funtzionamenduari buruzko ezagutzarik eza soilik; prozesu konplexuen efektu ez-linealak, atzeraelikadurako efektuek eta klima-seinalea ekosistemen bidez anplifikatzeak ere eragina dute. Azkenik, gure baitan bizi da ziurgabetasun handiena: hau da, zer eboluzio izango duen munduko biztanleen jarduerak berotegi efektu gasen emisioari dagokionez.

Horra hor AZTIren zuzendari nagusi Rogelio Pozoren hitzak, agerian utziz aurrean dugun erronkaren garrantzia. Hain zuzen, erronka horri eman nahi dio erantzuna, xumeki bada ere, datorren martxoaren 6an Ficoban klima-aldaketari eta itsasertzari buruz egingo den mugaz gaindiko Uhinak kongresuak.

Horretarako, hirugarren urte honetan, itsasoari eta kostari buruzko adituen eta kudeatzaile eta erabiltzaileen arteko sarea eratzen jarraituko du Uhinak-ek, errazagoa izan dadin irtenbideak bilatzea muturreko klimaren eraginei aurre egiteko eta arku atlantikoaren eremuan klima-aldaketara egokitzeko.

Edizio honetan, gonbidatutako adituen 12 hitzaldi eta guztira 45 komunikazio baino gehiago egingo dira, lau bloketan antolatuta: klima-aldaketaren oinarri eta erronkak; muturreko kostaldeko fenomenoak; ekonomia urdina eta arintzea; eta kudeatzeko eta erabakiak hartzeko tresnak. Laburbilduz, zientzialarien ikuspegia eta kudeatzaileen bitartekoak herritarren arazoetara hurbiltzea da kontua. Eduki guztiak Revista de Investigación Marina aldizkariko zenbaki berezi batean bilduko dira (http://old.azti.com/rim/).

Eduki berriak: posterrak eta erakusketariak

Gainera, aurten, poster formatuko komunikazioetarako erakusketa gunea izango du Uhinak kongresuak. Kongresu osoan zehar egongo da parte-hartzaileentzat zabalik, eta bertan askotariko gaiak jorratuko dituzte hainbat adituk: besteak beste, uhinaldien ondoriozko gainezkatzeak aurreikusteko tresnak; kostaldeko obrak miatzeko satelite irudiak erabiltzea; itsas-lehorreko jabari publikoan itsasbazterraren mugak judizialki zehazteko arazoak Frantzian; edo euskal hondartzetan kudeaketa iraunkorra lortzeko egiten ari diren hobekuntza-ekintzak.

Edukiak aberastuko ditu, gainera, nagusiki ikerketa ozeanografikoarekin lotura duen enpresa talde baten presentziak. Datozen urteetan arian-arian eskaintza hori aberasteko itxaropena du Uhinak-ek.

Iñigo Losada eta Robert Nicholls, gonbidatutako hizlarien artean

Aurten ere, nazioartean klimaren arloko erreferente diren zientzialariak erakarri ahal izan ditu Uhinak-ek. Besteak beste, nabarmentzekoa da IHC Cantabriako Iñigo Losadak (Kantabriako Unibertsitateko Ingurumen Hidraulikaren Institutua) eta Southampton Unibertsitateko Robert Nichollsek parte hartuko dutela.

Losada irakasleak Bide, Kanal eta Portu Ingeniaritzako doktoretza atera zuen Kantabriako Unibertsitatean, eta Ingeniaritza Zibileko doktoretza, berriz, Delaware Unibertsitatean (AEB). Ibilbide garrantzitsua egin du ikerkuntzaren eta ezagutzaren transferentziaren esparruetan, kostako eta offshoreko ingeniaritzari, itsasaldeko energia berriztagarriei eta kostaldeko klimari eta klima-aldaketari buruz.

Bestalde, Robert Nicholls doktorea kosta-ingeniaritzako ikerkuntzaren eta hezkuntzaren abangoardian dago. Kostaldeen epe luzerako kudeaketa hartu du bere ikerketaren ardatz gisa, batez ere, kostaldeen gaineko eraginari eta klima-aldaketarako egokitzeari dagokienez. Horien barruan, bereziki azpimarratzekoa da itsas mailaren gorakada.

Gero eta mugaz gaindikoagoa

Uhinak-ek mugaz gaindiko izaera indartzen jarraitzen du, hala parte hartzen duten erakunde, elkarte eta enpresen ikuspuntutik nola hizlarien eta biltzarkideen jatorriari begiratuz gero.

Biltzarkideen tipologiak argi erakusten du askotariko publikoak erakartzeko gai dela Uhinak Kongresua: kasurako, ingurumen arloko aholkulariak, portuetako agintariak, ingeniariak, eraikitzaileak, ingurumen-kudeatzaileak, ikerketa-zentroak eta unibertsitateak.

Uhinak-i buruz

Ficobak eta AZTI teknologia-zentroak sustatzen dute klima-aldaketari eta itsasertzari buruzko mugaz gaindiko Uhinak kongresua, eta erakunde hauetako ordezkariek osatutako batzorde tekniko baten laguntza jasotzen du orobat: Eusko Jaurlaritza (Ihobe), Gipuzkoako Foru Aldundia, Adegi, CSIC/ESADE/CEAB, Klima Aldaketaren Espainiako Bulegoa, BC3, EUCC Atlantic Center, EAEko Bide, Kanal eta Portu Ingeniarien Elkargoa, GIS Littoral Basque, Iraunkortasunaren Behatokia – Cristina Enea Fundazioa eta AZTI.

Gainera, hainbat instituzioren laguntza ere jaso du Uhinak Kongresuak: kasurako, Eusko Jaurlaritzaren Ingurumen, Lurralde Plangintza eta Etxebizitza Sailarena, Ihobe sozietate publikoaren bidez,Gipuzkoako Foru Aldundiarena,eta Communauté d’agglomération Pays Basque eta Región Nouvelle Aquitaine erakundeena.

Datu praktikoak

Uhinak Ficobako (Irun) entzunaretoan inauguratuko da ofizialki, martxoaren 6an (asteartea), 9:00etan.

Informazio gehiago: www.uhinak.com

Azken berriak

Erlazionatutako berriak