Uhinak 2018: Kudeatzaileek klimaren aldaketari aurre egiteko zer behar dituzten jakiteko eta zientziaren munduak haiei erantzuteko zer ekarpen egin dezakeen ikusteko diziplina anitzeko ikuspegia

(Irun, 2018ko otsailak 7 ) Martxoaren 6an eta 7an, III. Uhinak biltzarra egingo da, Ficoban, Ficobak berak eta AZTIk sustatuta, eta, berriro ere, zientzia, teknika, administrazio eta enpresa munduko adituak bilduko dira, elkarrekin ikustekozer egin daitekeen klimaren aldaketak eta muturreko fenomenoek Arku Atlantikoan dituzten ondorioei aurre egiteko.

Biltzarra mugaz gaindikoa izango da nabarmen, eta, aurten, 45 hizlarik hartuko dute parte. Besteak beste, hamabi txosten, ahozko aurkezpenak eta posterrak ekarriko dituzte, lau gai nagusiren inguruan: klimaren aldaketak kostaldean planteatzen dituen erronkak, muturreko gertakariak eta aurre egiteko jarduketak, ekonomia urdina eta klimaren aldaketaren arintzea, eta gobernantza eta klimaren aldaketa kudeatzeko eta erabakiak hartzeko tresnak.

Gai sorta zabal hori lantzeaz gain, aurkezten diren txostenak poster formatuan erakusteko toki bat izango da, biltzarraren iraunaldi osoan egongo dena zabalik, adituek hainbat gai lantzeko, hala nola olatuen ondoriozko uraldiak aurreikusteko tresnak, olatuen ondoriozko murgilketa fenomenoen krisialdiko kudeaketarako; kostaldeko obren azterketa sateliteko irudiak erabiliz; Frantziako legegile eta epaileen zalantzak itsasoaren eta lehorraren arteko jabari publikoan itsasertzaren mugak non dauden zehazteko; eta Euskadiko hondartzak modu jasangarrian kudeatzeko hobekuntza ekintzak.

Norentzat da Uhinak?

Bereziki, klimaren aldaketak itsasertzean dituen ondorioei dagokienez aukerak ikusten eta neurriak hartzen dituen eragile, enpresa, instituzio eta erakunde ororentzat da Uhinak; hau da, ordezkari politikoentzat, kostaldeko erkidego eta udalerrietako eta alor honetan eskumenak dituzten beste administrazio batzuetako teknikarientzat, teknologia eta ikerketa zentroetako adituentzat, unibertsitateentzat, eta enpresentzat eta enpresa elkarteentzat. Azken batean, zientzialarien ikuskera eta kudeatzaileen bitartekoak herritarren arazoekin harremanetan jartzea da helburua.

Itsasoko zaborra bistaratzeko erakusketa bat

Biltzarraren osagarri, “Facing the global challenge of marine litter” argazki erakusketa jarriko da, Life LEMA proiektuaren barrukoa (http://lifelema.eu/). LIFE Ingurumenaren eta Klimaren aldeko Ekintza Programaren barruan dago Life LEMA proiektua, eta tokiko agintariei itsasoan igeri dabilen zaborra modu jasangarrian kudeatzeko arau eta tresna inteligenteak ematea du helburu.

Sei bazkidek osatutako nazioarteko lantalde batek eratzen du proiektua: Gipuzkoako Foru Aldundia da burua,eta AZTI eta Rivages Pro Tech (Suez) ikerketa zentroak, Syndicat Mixte Kosta Garbia erakunde publikoa, Biarrizko Udala eta Surfrider Foundation Europe gobernuz kanpoko erakundea dira gainerako partaideak.

Uhinak

Uhinak Klima Aldaketa eta Itsasertzari buruzko Mugaz Gaindiko Biltzarra Ficobak eta AZTIk sustatzen dute, eta batzorde tekniko baten babesa du. Hain zuzen ere, erakunde hauetako ordezkariek eratzen dute batzorde hori: Eusko Jaurlaritza (Ihobe); Gipuzkoako Foru Aldundia; Adegi; ESADE – CEAB-CSIC; Klima Aldaketarako Espainiako Bulegoa; BC3; EUCC Atlantic Center; Bide, Ubide eta Portuetako Ingeniarien Euskadiko Elkargoa; GIS Littoral Basque; Iraunkortasunaren Behatokia – Cristina Enea Fundazioa; eta AZTI.

Era berean, erakunde ugarik babesten dute Uhinak, hala nola Eusko Jaurlaritzako Ingurumen, Lurralde Plangintza eta Etxebizitza Sailak, Ihobe sozietate publikoaren bitartez; Gipuzkoako Foru Aldundiak; Euskal Hirigune Elkargoak; eta Akitania Berria Eskualdeak.